Psa 98 | TUCO | STEP | Ambou mbouŋ paghu pa Yoova! Pasa, mbeb gharatooŋadi to ye ighamgham di, nene ite kat. Nima waan iparab ariaŋa le ilib pa koia wa. Ye ipatooŋ tapiri patabuaŋ, ve igham mulin tamtoghon toni.

aIgham 15:6,12,16; Mbo 118:15-16; Lu 1:51

bLu 2:30

cMbo 96:10; Mbaŋ 17:31

Psalms 98

Maaron, ye kinik tiina to iparab ariaŋa le ilib pa koia

1 Ambou mbouŋ paghu pa Yoova!
Pasa, mbeb gharatooŋadi to ye ighamgham di, nene ite kat.
Nima waan iparab ariaŋa le ilib pa koia wa.
Ye ipatooŋ tapiri patabuaŋ, ve igham mulin tamtoghon toni. ^a

2 Yoova ivotia ulaaŋ tiina to ye igham pa tamtoghon toni.
Ye ipatooŋ ŋgar toni deŋia ila ndug ndug matadi, ve tighita katini wa. ^b

3 Saveeŋ to ye imbua toman yes Israela, mata iŋgalŋgali, ve itataghoni.
Tauto lolo ineep tuŋia ila todi ve iuluul di.
Maaron toit iparab ariaŋa, ve igham mulin ghiit ila ndug tisob to taan matadi, ve tighita wa.
4 Yam taan to naol ne, asob lolomim poia pa Yoova, ve alool ve apait iza.
Tinimim iza pani, ve ait mbouŋ pa apaiti.

5 Apambar ambam ve arab gita, ve ambou pa apait Yoova!
Apambar ambam ve arab gita le titaŋ poia, ve apakuri.

6 Yoova, ye kinik tiina.
Tinimim iza pani, ve avib tavuur toman trampet ila nagho, ve alool ve apaiti.
7 Te toman mbeb naol to anepneep ila te lolo, yam alool ve apait Yoova!
Ve taan toman tamtoghon ve mbeb naol to anepneep ila taan, yam paam, alool ve apaiti!

8 Ve ya to naol ne paam, asob apambar nimamim pani, ve apaiti.
Ve yam lolooz, asob alup avomim, ve ambou toman lolomim poia izi Yoova nagho, ve alool ve apait iza.

9 Pasa, ye ighaze inim. Leso iŋgabiiz tamtoghon tisob to taan, ve ighur atia padi.
Pale iŋgabiiz ndug tisob to taan.
Ve gabizooŋ toni, nene deŋia moghon. ^c